Mary Laub (Kutztown, PA)
Yeder Yaahr gleiche mer en Gaarde blanse. So im Friehyaahr hemmer Sume gekauft. Weil mer im Busch wuhne, blanse mer Sume as net viel Sunn hawwe misse. Un mer hen net genunk Blatz fer Welschkann, Grumbiere, Wassermelun, Karebse, un anneri, so kaafe mer ken Sume fer selli. Yaahre zerick henn mer Sume fer Gehlriewe, Aerebse, un Schpinaat kaaft – awwer net nau. Fer was? Die Wareme! Sie sin in de Gehlriewe gange, wu sie am Waxe waare!
Mei Aenti hot gsaat, as mer Esch mit die Sume neiduh sott. Awwer des hot net fer uns geschafft! Nau fer die Aerebse. Mer gleiche sie ganz viel, so ee Yaahr henn mer die Sume kaaft. Wann mer sie geroppt henn, waare die Blanse voll mit Blansungeziffer! Mer henn gedenkt, as mer sie mit Insecticide gschpritze sott. Awwer mer gleiche ken Chemicals druff duh. So heitesdaag kaafe mer ken Aerebse Sume fer blanze. Was noch? Die Schpinaat Sume! Ah, vielleicht meinscht du Popeye, der Schiffman! Er hot allsfatt Schpinaat gesse un hot gut Gesundheit ghat.
Gut Gesundheit iss aa wichdich fer alli-epper. So hemmer Schpinaat Sume kaaft, weil wann es gewaxe hot, hemmer es picke kenne fer in unser Salaat neiduh. Des schafft gut, weil es Wedder kiehl waar. Awwer wann es Wedder waarem iss waarre, hot es gschosse un mer henn sie die Blanse ausroppe misse! So heitesdaag kaafe mer ken Schpinaat Sume. So, was fer Sume duhne mer in unserem Gaarde blanse?
Mer kaafe Sume fer Rotriewe, Kochbohne, Swiss Chard, un alsemol Zwiwwel Sets. Awwer weil mer net so yung sin un kenne net uff unser Gnie so gut graddele, wie mer Yaahre zerick henn kenne, kaafe mer Blanse un net zu viel Sume. Mer kaafe die Blanse wie Pfeffer, Oierblanse, Tomaets, Selaat, Gummere, Zucchini, un Pederli. Un letscht Yaahr weil mer henn wennich Blatz, hemmer Blumme Sume geblanst!! Hoscht du gewisst, as meh as zehe dausend Yaahre zerick, henn Leit Sume geblanst? Waricklich Sume sin rauskumme baut zwee hunnert milliyoon Yaahre zerick. Sell iss eppes!
Es wunnert mich, eb eenichepper weescht, was iss die greescht un die glennscht Sume. Ich hab mich awwer ordlich verschaunt wann ich des ausgfunne hab! Die greescht iss en Dopplecoconut Sume. Sie wiege baut fimfunfuffzich Pund, sin baut achtzeh Zoll lang, un nemme baut zehe Yaahr fer zeidich warre. Du kannscht sie im Seychelles finne, en Insel Land as Oscht vun Afrika iss. Die glennscht iss en Satt Gungelrieb. Die Sume sin wie Schtaab! Humm…Ich hab gedenkt, es waar die Moschdert Sume. Nau hawwich meh glannt! Yammer yeh!! Ich hab net eenich ebbes wege Umgraut Sume gschriwwe! Wu kumme sie bei? Vum Wind odder die Vogel? Ich wees net, awwer sie sin alsfatt in meim Gaarde un alliwwer! Weescht du der Johnny Eppelsume? Er hot Eppelsume alliwwer geblanst! Ei, ei, ei! Es gebt so viel Sume, as ich net schwetze kann devun!
Gut Gick mit deine Sume, wann du deel blanscht! Un geb acht fer die Umgraut Sume!
Hiwwe wie Driwwe Award 2026
