Em Iemker sei Winsch

1.So en gleeni Iem zu sei, 				
Fer mich waer ebbes schee.			
Mei neii, grossi Familye heesst,			
Ich waer niemols allee.				
 
2.Ich hett so viel Geschwischdere, 		
die mehnscht devun waer’ Meedel.		
Es zeehlt dazu die Buwe aa,			
Mer finnt sie net so edel.				
 
3. Mei Drohne-Brieder gleich ich net,		
Sinn narrisch, faul un dick.			
Sie fresse yuscht un hocke rum.			 
Sie duhne schier gaar nix.				
 
4. Die Keenichin iss unsri Memm, 		
Hot dausende vun Kinner.				
Fer sie iss immer Schwangerzeit,		
Doch net emol im Winder.			
 
5. De Ieme ihre Schaffes iss weit bekannt,  	
So nitzlich, wusslich ‘n Greadur.			
Die Wege devun waert ’ne gelehrt.		
Wer ihre Lehrern? ‘S iss die Nadur!		
 
6. Mer gheert sofort zume grosse Chor.		
Wie fein ‘s brummt, der himmlisch Klang,	
Yeder bringt sei eegni Schtimm, 			
Harmonisch schallt’s, ihre rein Gesang. 	
 
7. Was nau?  Ich guck so anners aus!		
Ferwas sechs Bee, un haarich?			
Ferwas mei Aag’ sinn wiescht un bees,		
Vier Fliggel, dinn un schtarrick.		
 
8. Ich hab aa en Schtecher grickt, 		
Ich yuus ihn yuscht in Not,			
Ich bin gewehnlich zaahm un braav,		
Die feindlich Weschpe schlaag ich dod.	
 
9. Mei eenzig Gleed iss schwarz un gehl.	
Ich weer’s gaern alli Daag.			
Die Schtreefe druff sinn modisch, gel?		
Sie basse mir unne Froog!				
 
10. Ich, die frehlichscht Iem im Kaschde, 	
Es waer mei greeschdes Glick,		
Wann die Fortuna, liewi Fraa,			
En niedlichs Meedel, fer mich schickt.		
 
11. Sie witt mei Julia, un ich ihr’ Romeo.	 	
Mer weess voraus ken wie un wann.		
Es Schicksal duht’s bschtimme.			
So geht’s die Lieb fer Fraa un Mann.		
 
12. So Adem un die Eva, im Gaarde Paradies,	
Mir ruhe unnich em Abbelbaam. 		
Un decke uns mit me Feigeblatt,			
Ich glaab gewiss, iss nur en Draam.		
 
13. Newwich enanner mir fliegge fatt, 		
Mir schwewe ins Freie, ins Blooe hoch.		 
Nuff un nidder, hie un her 				
Dann heem zum Karebloch.			 
 
14. Vun Blieht waert Schtaab gesammelt, 	
Vun Bungert, Schwamm un Wies,  		
Die Waerickieme schtehn eifrich bei,		 
Un mache devun ihre Hunnich siess. 		
 
15. Zuletscht duhn’ mir en Schwenzeltanz.	
‘S iss ball Zeit fer schloofe geh.			
 Mir kuschele innewennich em Schtock,	           
Bis Friehyaahr dann, atschee! 

Edward Quinter (Allentown, PA)
Hiwwe wie Driwwe Award 2024