Friedensbottschaft

Es dunnert lang un ‘s dunnert hatt
An so en Friehyaahrsowed zaart
Wu mir drin in Ruh un Friede hocke
Ariyets sunscht fiehrt Krieg mit Bombe

Un so schreib ich daere Friedensbottschaft
Un ich meen ‘s recht aernschthaft
Es kummt doch net nur die Landschaft in Gfaahr
Awwer aa die ganse lewendiche Scharr

Die Welt iss weit un voll vun Leit
Un ich kann’s net verschteh
Ferwas mir schtreide un zu schlachde eile
Fer ebbes ach so glee…

“Die Gschicht waert uns nix lehre”
Hot ‘n gscheiter Mann gsaagt,
Un so wie bei de siesse Hemmbeere,
Geb uff die Danne Acht.

Un so saag ich daere Friedensbottschaft,
Un ich hoff es gebt eich Graft.
‘S iss yo alles e Sinn un e Schann,
Doch somehow ewe gebaelenst.

Die Welt iss weit un voll vun Leit
Un ich kann’s net verschteh
Ferwas mir schtreide un zu schlachde eile
Fer ebbes ach so glee…

Wie lang waert’s fattdauere?
Wohl en Yaahr odder meh…
Der Dod hot Gescheft zu duh,
Zaahlos Heife dezu…
Wie kann mer blooss weidermache
Wann mer verlangt yuscht Raache?
Un die Schtill un Gram gehn nimmi weck
Bis alles schee verreckt…

Es dunnert lang un’s dunnert hatt
An so en Friehyaahrsowed zaart
Wu mir drin in Ruh un Friede hocke
Ariyets sunscht fiehrt Krieg mit Bombe…

Scott Reagan (Pen Argyl, PA)