Midde im Summer
vun Sunneschtrahle gschtrechelt
zart warm weech
vun Blummegsichter aagelacht
farwefroh lewensfroh
dezu voll Inbrunscht
e Solo vun ere Grill
un midde nei
in mein behaachliche Summerdaag
des Wort doot
zamme mit deim Name
vor korzem noch
Werder zwische uns
fladdere gelosst
leicht
wie Schmedderlinge
mer kennten uns
den Summer
mol widder sehne
minanner verzehle
schee esse gehe
es hot Aadeidunge gewwe
un ich hett
ebbes merke gekennt
wisse gemisst
wie launisch die Zeit
mit ehm umgeht
ich awwer
aarisch beschaefticht
un schliesslich
de Summer yo noch lang
Gisela Gall
(Bad Dürkheim)
1. Preis
60. Mundartdichter-Wettstreit
Bockenheim 2012
