Kategorie-Archiv: Deitsch Web TV

Die letschte zwee Woche waar ich in Pennsylvaani gwesst un hab en wunnerbaar guudi Zeit ghatt. Ich will noch meh schreiwe vun sell, wann ich nimmi so mied bin which seller verdullt Jet Lag. Eens vun die Highlights vun mei Rees waar en Meeting mit die fimf Miller Brieder in Virginville (PA). Die Buwe sinn zamme am singe fer meh ass 50 Yaahr – un henn als noch en latt Geschpass. Haricht sell mol ab!

Adam Yoder weess net, wu mer sei Satt „Deitsch“ verschteh kann im alte Land. Mer kenne ihm sell saage: In die Pfalz (Palatinate) im „Rhine Valley“. Datt schwetze die Leit en Mudderschprooch, ass aarick neegscht iss zu sell, was die Pennsylvanisch-Deitsche als noch am schwetze sinn.

Heit hemmer ebbes Abbadiches fer sehne. Nau, was haeppent, wann en Nei Jersey Guy naach Pennsylvaani kummt un deitsche Leit aadrefft. Die Jesse Tobin, der Matt Sicher un der Rob Lusch henn en glee Video geduh in deitsch un englisch) iwwer en Schtori wie sell. Guud Tschabb! „Hiwwe wie Driwwe“ deet gleiche, meh Videos zu sehne uff Youtube wie sell – awwer ferschur gaaaaanz deitsch. Was seid dihr am driwwer denke, Jesse, Matt un Rob?

Die alte Leit schwetze die Mudderschprooch annerschder wie die yunge duhne, un die bleene Leit (Amish, Fuhremennischte) schwetze sie en wennich annerschder wie die Luddrische/Reformierte un Non-Plain Mennonites. Der Naame „Yoder“ weist, ass die Catherine verleicht en Mennischt iss, un ass sie schwetzt uff die Guckbax, ass sie net „bleen“ iss. Awwer sell wisse mer all net ferschur …

Nau bin ich hallich! Der HwD Drucker hot es erscht Video gfunne, ass der Lee (seller Kall, ass es letscht Video geduh ghatt hot) zamme mit sei amischer Freind, der John Ebersol, geduh hot. Nau kennt dihr heere, wie die Amische in Pennsylvaani schwetze. Ferschur gleicht er net, wammer en Pickter nemmt – awwer er schwetzt doch in die Camera, so ass mer ebbes lanne kann vun der Weg, wie er die Mudderschprooch am schwetze iss. ‚S iss en latt Englisch drin – sell iss der Weg bei alli Amische un Fuhremennischte. Awwer ennicher … haricht sell mol ab.

Glaabt’s odder net, awwer yuscht heit hawwich noch en yunger Deitschlanner gfunne uff Youtube. Wilkum zu die Mudderschprooch un hald dei guud Arewet aan!

Henn dihr gedenkt, ass nur bei die Amishe un die Fuhremennischte die yunge Leit noch deitsch am schwetze sinn. Nee, ferschur net. ‚S gebt aa deel annere Kalls un Weibsleit unnich die Luddrische un Reformierte, ass die Mudderschprooch gleiche un aa glannt henn, sie zu schwetze. Do iss eener mit Naame Tanner. Mir wisse net zu viel vun seller Kall, awwer verleicht finne mer noch en wennich meh aus, was er duht un ferwas er noch deitsch am schwetze iss. Nau, haricht sell mol ab. Sell laut ganz guud!