Kategorie-Archiv: Deitsch Web TV

Keith Brintzenhoff vun Kutzeschtettel weist unser Bsucher der pennsylvaanisch-deitsch Dulcimer. Er singt „Schlof, Bobbeli schlof“, en Schtick, ass guud bekannt iss im alde un im neie Land – hiwwe wie driwwe. Wer gleiche deet meh heere vum Keith, kann sell in October in Deitschland duh. Der Keith gebt drei Concerts in die Pfalz: October 19 im „Auswanderermuseum Oberalben“ neegscht zu Kusel, October 20 beim „60. Pfälzischen Mundartdichterwettstreit“ im Schtettel Bockenheim un October 21 beim „7. Deutsch-Pennsylvanischen Tag“ in Landau-Mörlheim. Wer meh Information gricke will, kann en E-Poscht schreiwe zu „Hiwwe wie Driwwe“.

Virgil Shrock hot sei Freindschaft gebsucht in Indiana im Summer. Datt henn sie um der Disch ghockt un minanner deitsch gschwetzt. Sell iss ebbes fer abhariche …

Mir sinn froh, ass die guudi Leit vun Baricks Kaundi Community TV (BCTV) nau gschtaert henn, ihr „Deitsch Schtunn“ uff „Youtube“ duh. Sellerweg kenne meh Leit sell sehne, wann sie geindresst sinn.

Der John E. hot en Bauerei un verzehlt ebbes vun sei Gediere. Mer kann ebbes lanne in des do Video vun der Weg, wie die Amish die deitsch Mudderschprooch alleweil noch am schwetze sinn.

Alvin Miller schwetzt sei pennsylvanisch-deitsch Mudderschprooch der Weg, wie mer’s in Indiana duht. ‚S laut en wennich different zum „Pennsylvanisch“ pennsylvanisch-deitsch Weg, awwer net zu viel. ‚S Interview waar geduh beim Virgil Shrock vun Ilinois, ass nau in Paris (France) wuhnt. Ganz am End froogt der Virgil: „Bischt du im Hostetler sei (Genealogy) Buch?“ Un der Alvin antwatt: „Alliebber iss.“ Nau, ich kann yuscht saage, ass ich noch net ausgfunne hab, ass aa ich drin sei sett – awwer mer henn aa en latt Freindschaft, ass vun Switzerland beikumme iss.

Alleweil gebt’s meh ass 200,000 Amish in Natt America, un sie warre zweemol so grooss in Nummere alle 20 Yaahr. Awwer net alli yungi Leit warre en Glied vun die Amish Gmee. Deel verlosse ihr Heemet, eb sie gebaptized sinn, un deel naach sellem. Sell iss ebbes, ass hatt zu duh iss, weil selli Leit verliere ihr Heemet un ihr Freindschaft. Ebbes, ass sie net verliere, iss awwer die pennsylvanisch-deitsch Mudderschprooch. Do kennt dihr en Schtori abwatche vun en Amish Familie, ass nimmie Amish iss heit …

Sitter 1976 iss Tschuun 28 der „Pennsylvania German Day“ – alle Yaahr! Sell waar neegscht vergesse in die letschte Yaahre, so hot der Governor vun Pennsylvaani, Tom Corbet, en Proclamation geduh: „German Americans, commonly known as the Pennsylvania Dutch, have contributed significantly to all aspects of daily life in the commonwealth. We salute their commitment to the preservation of this rich heritage.“ Iss sell net ebbes?