Kategorie-Archiv: ‚S Katz Deitsch Schtick

Fer die letschde paar Daage mei Land iss darrich en Uffwache gange. Uff de 25. Moi war der George Floyd, en schwatze Mann in Minneapolis, vun en Bolismann dodgemacht. Viel vun eich kenne schun die Gschicht. Er hot ken Flint ghatt, er hot nix Gewaltiges gemacht. Awwer am End waar er zum Grund gschmisse un der Bolismann iss mit sei Gnie uff dem George sei Hals geduh … bis der George gegrische hot, „Ich kann net schnaufe! Ich kann net schnaufe!“ Ee paar Schtund schpaeder iss er in en Grankehaus gschtarewe.

Fer die ganze Gschicht vun mei Land viel Leit, die Schwatze, die Braune, die Inschinge…die alle hen net schnaufe gekennt. Un nau hocke mir uns do im 2020, un viel vun ihnne kenne noch net schnaufe. Mei Land hot ihre Freiheit, ihre Draame, ihre Menschlichkeit, ihre Lewe weckgenumme. Net yuscht weckgenumme, awwer fer viele weckgschtohle. Was gschehe iss, iss gschehe. Mir kenne die Vergangeheit net ennere, awwer mir kenne die nau un die Zukunft ennere. Mir kenne mei Land in en neier Richdung fiehre. Awwer waerre mir?

Zidder dem George sei Dod, sin viel Leit uff die Schtross gemartscht. Die rufe fer en besseres Land un en bessere Umschtand fer unsere Brieder un Schwester vun Fareb. Die Leit sehne en bessere Amerikaa. Een, wu all Amerikaaner die gleiche Meeglichkeite hen, die gleiche Rechte hen, en Land es in die Constitution un die Unabhaengigskeit Erglaerung beschriwwe iss. Mir schtehne nau uff en Drehpunkt in unsre Gschicht. Mir sin meh ass ee Mol uff so en Punkt gschtanne: nooch der Unabhaengiskeitgrieg, nooch der Briedersgrieg, nooch der Civil Rights Movement. Alle Mol sin mir uff en Drehpunkt gschtanne, un mir hen es net rechtgeduh. Nau schtehne mir widder do, was duhne mir des Mol? Was machscht DU des Mol? Mir misse zamme schnaufe, mir misse en besseres Land schaffe, mir misse echde Gerechdichkeit bringe un erlewe. Mir kenne es duh, mir misse es duh. Var 500 Yaahre, der Karrich Verbesserer, der Martin Luther, hot gsaat: „Du bischt net yuscht gutschteh fer was du saagscht, awwer aa, fer was du nicht saagscht.“ Schwatze Lewe zaehle.

Douglas Madenford

https://hiwwe-wie-driwwe.com/wp-content/uploads/2020/02/img_20200202_152605-e1580759662619.jpg

Was die Grundsau Ray gsaat hot im alte Land

Ich kumm vun Pennsylfawnia,
Gebore war ich datt,
Doch wie der Donald Trump iss kumm,
bin ich mol dabber fatt.

Weil er schpielt ya als so gern Golf,
un gleicht kenn Grundsauloch,
Wann er sein Balle drin verliert,
Holt er sei Flint mol doch.

Browiert mich schiesse wie net gscheit,
Ich gleich mei Lewe aarick,
Drum bin ich kumme in die Palz
Un uff der Dunnerschbarig.

Ich bin so dankbar fer der Blatz,
Un ass ich daref datt bleiwe,
Was deet ich helfe, wann ich kennt
Der Winder ball verdreiwe …

Un Leit, ich hab kenn Wadde:
Ich sehn naryiets kenn Schadde.
Der Winder, des sehnt yeders ei,
Macht Blatz fer‘s Friehyaahr — des kummt glei!

Grundsau Lodsch No. 19 im alte Land, der zwett Hanning 2020
Herbert Tiefel (Haabtmann) / Michael Werner (Unner-Haabtmann)

Hattiyee Angelina, mei Bobbli, mei Kind,
Ich muss weit fatt nau, ich flieg mit der Wind.
En wiescht Kall browiert graad zu schtehle dei Zeit.
Mach’s guud, Angelina, der Himmel, der brennt schun,
Un mei Weg iss weit.

Du muscht mich net bleeme, un sei net verzannt.
Ich bin, wie ich waar, un bin dir guud bekannt.
Un doch iss mei Schtuhl leer am Disch, wu du schtehscht.
Hattiyee Anglina, der Himmel duht dunnre,
Wu du aa gehscht.

Es fiedre die Groosskepp Godzilla ganz leis,
Un die Welt guckt yuscht zu un denkt schwatz odder weiss.
Mer henn net viel Zeit un sie laaft uns devun.
Hattiyee Angelina, am Himmel watt’s hell,
Doch sehnt mer kenn Sunn.

Un eemol die Woch saagt der Parre ganz laut,
Es iss guud, wann Fense un Maure mer baut,
Weil Leit, ass do kumme an unser Deer,
Weescht Angelina, sie denke net grischtlich,
Drum schickt sie ins Meer.

Harich mol, die Flinte, heerscht sie vun weit?
Mir hocke noch ruhich, doch datt schtarewe Leit.
Die Groosskepp sinn eifrich un zaehle ihr Geld.
Hattiyee Angelina, ihr Keenich guckt orange –
Un so duht die Welt.

Hattiyee Angelina, mei Bobbli, mei Kind,
Ich muss weit fatt nau, ich flieg mit der Wind.

Mei Riggelweg

Wann ich mol ganz umleidlich bin
Un niemand meh will seh,
Noht graeddle ich die Schteg enuff,
duhn uff mei Schpeicher geh.

Datt schteht mei alter Riggelweg,
Grooss ess er, gmacht vun Tin.
´S gebt blendi Heiser, Leit un Beem,
En Station middes drin.

Was bin ich alsemol verzannt,
Un grick en rooder Kopp,
Denk ich an sell grooss dabbich Wand. –
Noht drick ich uff der Knopp.

Un schun schtaert glei mei Riggelweg,
Weess nix vun aarme Leit,
Ass welle besser lewe yuscht,
Fer alles sinn bereit.

Mei Riggelweg weess nix devun,
Ass mer nau Kinner trennt
Vun ihr Familie, denk yuscht mol.
Ich weess, was mer sell nennt …

Doch saag ich nix, inschtatts vun sell,
Watch ich mei Riggelweg,
In Circles geht er schnell wie nie,
Ganz naach seim Leweszweck.

In seim Land gebt’s kenn Weisshaus net,
Kenn Karich un kenn Gmee,
Kenn Bressens un kenn groossi Wand,
Un alles, was ich seh …

Sinn kummne Leit, sie gucke ´s seem,
Vun owwe – glee wie nie,
Wasewwer aa ihr Ziel sei mag:
Sie gehn in Circles hie.

Un darich die Zeit verliert sich doch,
was dumm iss un was gscheit,
Was nau noch recht iss, iss ball letz,
´S kimmert mich nix heit.

Un ewich geht der Riggelweg,
Weess nix vun guud un bees,
Un ass sei Weg unendlich iss,
Iss alles, ass er weess.

Milton Ivvahzvarich (2018)

Guder Daag Blog Leser! Well, ‘s iss widder Matz, un in Lebanon Kaunty sell mehnt, ass es widder Zeit fer der Zammelaaf iss. Des Yaahr alles watt uff die Lebanon High Schul sei. Der Zammelaaf iss en arrig gude Gelegeheit viel iwwer unsre Schprooch, Kuldur, Kunscht, Gschicht un Esse zu lanne un zu erlewe. Es gebt viel Verkaafer, Entertainment, Schwetzer, un Myusick. Ass mer uff die Flyer owwe sehne kann, gebt es viel zu sehne un heere. Un, net zu bralle, awwer es gebt en arrig gude Show um Vaddel eb drei Uhr. Ich hab gheert ass die zwee Kalls arrig luschdig sinn. Wann du glee bissel Zeit naegschde Samschdaag hoscht, un du wuhnscht net zu weit weg, kumm mol naach Lebanon un bsuch des Event! Wann du mich sehnscht, saag “Guder Daag” un dann kenne mir schwetze!

Doug Madenford
Co-Editor „Hiwwe wie Driwwe“
https://padutch101.com

Ganz schtill

Ganz schtill leischt du do, kannscht mich net heere.
Dei Aage sinn weit uff wie nie.
Gaeb’s yuscht en Weg, dei Ruh zu schteere,
Ich deet dich nemme ariyets hie.

Wie waar der Mariye so guud un schee,
Du waarscht deheem, bischt gange noht –
Un in die Schul. Un was ich seh
Iss nix wie Blut – un du bischt doot.

Do waar en Kall, do waar en Bix.
En Sack voll Bullets un schunscht nix.
Du hoscht gehockt am letze Blatz.
Der Schuss waar schnell – Dei Lewe katz.

Ganz schtill leischt du do, kannscht mich net heere.
Dei Aage sinn weit uff, mei Kind.
Waere mir schmaert, deet uns sell lehre
Es Lewe meh zu gleiche wie en Flint.

(In memoriam)

Guder Daag Blog Leser! ‚S iss schpot Yenner … Hanning kummt. Dihr wisst, was sell meent: Grundsau Daag kummt gschwindt. Fer uns Deitsche iss Grundsau Daag wie en heilige Daag. Verschiddliche Grundsei kumme aus ihre Lecher un brophezeie iwwer es Wedder fer de naegschde sex Woche. Bleibt Winder lenger, odder kummt es Friehyaah frieh? Die Grundsau saagt uns. […]

über Grundsau Lodge Zeit! — Nau loss mich yuscht eppes saage!