Kategorie-Archiv: ‚S Katz Deitsch Schtick

Am zwette Hanning

Zum Wedderbrophet:

Grundsau! Grundsau!
Saag uns mol vum Wedder nau!
Iss der Winder ball verbei,
Odder watt’s noch wieschter sei?

Die Grundsau

Waart emol! Am zwette Hanning
Weis ich dihr mei Wedderlanning:
Ya, des weess ich viele besser
Wie die Dokter un Brofesser!

Deel, die gucke naach die Stanne,
Wolle’s Wedder datte lanne;
Dann sinn annre Weddermenner,
Deide’s Wedder vum Kalenner.

Meene noch, die Gensbrophete
Wunners, was sie wisse deete;
Was sie bralle, was sie boche,
Mit’me dumme Gensegnoche!

Glaabt net yedre alde Fraa!
Ich geh annerschter do draa:
Hawwich net en gudie Naas,
Besser wie en Wedderglaas?

Wann ich aa noch schlaefrich bin,
Hawwich’s awwer doch im Sinn,
Iwwerdem mol uffzuschteh
Un mol aus’em Loch zu geh.

Iss es dann en wennich drieb,
Well, des waer mer graad so lieb;
Schnee un Kelt waer dann verbei,
Friehyaahrswedder hett mer glei.

Un dann fang ich aa zu danze,
Fress mer mol en voller Ranze;
Ya – des macht mich immer lache –
Brauch aa net emol zu schaffe!

Awwer, scheint en bissel Sunn,
Bleibt der Winter, weess ich schun,
Immer noch sex Woche lang;
Un do watt’s mer angscht un bang.

Ei, was hett ich dann zu lewe?
Ya, do kaemt ich wiescht deneewe!
Kalter Wind un Schnee so dief –
Kaemt am End noch uff „Relief!“

Oh, des waer fer mich en Schand!
Grundsau hot doch meh Verschtand,
Losst sich net dehinner finne,
Brauch sich aa net zwee mol b’sinne.

Un im neegschte Aageblick,
Bin ich schun im Loch zurick;
Winter losst mer Winter sei,
Un dann schlof ich widder ei.

JOHN BIRMELIN (1938)

Wann’s kalt iss un duschber iss in Pennsylvaani, gehne die Leit datt alsemol Elbedritschlicher yaage. Ya, sell iss gschpassich – abbadich fer die Leit, wu nix wisse vun seller Gebrauch. Die meenschte Leit wisse net, ass die Musiganter vun die Band CCR etliche Yaahre zerick aa mol in PA gwessst sinn fer so en Elbedritsche Yacht, un wie sell verbei waar, henn sie en pennsylvanisch-deitsche Version gemacht vun ihr Schtick „Bad Moon Rising“. Datt iss es:

Elbedritsche Yacht

„Kumm, geh mit uns heit Owet yaage,
dief in der Busch, mir welle Gschpass.
Loss dir vun uns mol ebbes saage,
du hebscht der Sack, noht fangscht du was.“

GEH NET NAUS HEIT NACHT,
‚S ISS ELBEDRITSCHE YACHT,
DIE BUWE RETZE DICH – GEB ACHT!

„Guckt wie en Voggel mit zwee Hanner,
Schnawwel, Fliggel, Feddre un aa Haar.
En Gans die eeni Seit, en Ent die anner,
En Hinkel zwischich drin, ya, des iss wahr.“

GEH NET NAUS HEIT NACHT,
‚S ISS ELBEDRITSCHE YACHT,
DIE BUWE RETZE DICH – GEB ACHT!

„Guck, mir gehn fatt un welle suche,
des glee Gedier, ass niemand kennt.
Wammer es sehn, not watt es fluche,
dreiwe’s mit Gekrisch, noht kummt’s gerennt!“

GEH NET NAUS HEIT NACHT,
‚S ISS ELBEDRITSCHE YACHT,
DIE BUWE RETZE DICH – GEB ACHT!

„Wann du uns gar nimmie duhscht heere,
sei bloss net bang un waart en Zeit,
denk draa, mer duhn dich ebbes lehre,
wann’s duschber watt, noht iss’s so weit:“

HEB DER SACK HEIT NACHT,
‚S ISS ELBEDRITSCHE YACHT
WASCHT BALL SEHN, ASS BLENDI GSCHPASS SELL MACHT!

HEB DER SACK HEIT NACHT,
‚S ISS ELBEDRITSCHE YACHT
WASCHT BALL SEHN, ASS BLENDI GSCHPASS SELL MACHT!

„Hiwwe wie Driwwe“ winscht alliebber im alte un im neie Land
en hallicher Grischtdaag un en guudes nei Yaahr 2016!
Der Comic waar gemacht beim Eugen Keck im alte Land. Grooss Dank fer sell. Zum Schtaerte misst dihr yuscht uff der geele Gnopp dricke.

Es Team vun „Hiwwe wie Driwwe“

Der bucklich Tschaeck

Es iss gewiss schun zwanzich Yaahr,
ass ich bin fatt vum heem.
Die Memm hot laut gebrillt, ich hab
sie nie net widder gsehn.

Ich bin gezogge naach Carbondale.
Ich wott, ich waer nie weg.
Hab gschafft mei Lewe in die Meind,
Nau bin ich der bucklich Tschaeck.

Die Arewet iss net leicht geschafft,
in seller duschber Kaelt,
wu yunge Buwe gucke als
wie die eldscht Kalls uff die Welt.

Ferwas bin ich naach Carbondale.
Ich wott, ich waer nie weg.
Hab gschafft mei Lewe in die Meind,
Nau bin ich der bucklich Tschaeck.

Ihr Buwe, draus im Lechaa Daal,
in Baricks un drumrum,
bleibt yuscht uff eier Bauerei
die Meind, die bringt eich um.

Ferwas bin ich naach Carbondale.
Ich wott, ich waer nie weg.
Hab gschafft mei Lewe in die Meind,
Nau bin ich der bucklich Tschaeck.

Milton W. Ivvahzvarich
(Music: Crooked Jack)

De Yahreszeide ihr Doot

Hedde dihr bemarrickt ass die Yaahreszeide am Schtaarewe sinn? Nee, ich schwetz net iwwer Global Verwaareming, odder Dings wie sell. ‚S iss yuscht ebbes ass ich bemarrickt hab, ass ich alter warre.
Am Menscht, die Welt watt en besser Blatz, ass wann ich en Kind waar. Zum Beischpiel, heidesdaags kenne mir viel gude Esssache von all iwwer die Welt griege. ‚S iss immer Summer, ariyets im Welt, odder Friehyaahr, odder Harebscht, doch wann mir Hembeere waxe deete, kennde mir unsere iwwer der See schicke, wann sie zeidich sinn, unn annermols kennde sie uns ihre schicke, doch hemmer immer Hembeere. Unn sell iss en recht gut Ding.
Unn doch…ich meen, mir henn ebbes verlore.
Wann mir net Hembeere darrich’s ganz Yaahr ghatt henn, henn mir uns uff die aerscht Woch in Tschulei gschpitzt, wammer Quart noch Quart von schwartze Hembeere grickt hedde. Mir hedde groosse Schissle voll Hembeere vom Hof reigebrocht, unn hedde sie mit Zucker unn Millich fer Sobber gesse. Odder mei Mudder hett Hembeerebois gmacht, eens nochenanner, bis mir satt warre waere. Verleicht waere mir verleed mit Hembeere warre, awwer mir henn’s nie geduh, ass die Season so katz waar.
Dann hedde mir uns uff die aerscht Woch in Awkscht gschpitzt, wann die Biere zeidich warre waere. Wammer in die Biere gbisse hedde, hedde mer forwaerts gelehne misse mit unsere Fiess ausgebreht, fer’s Saft von unserer Gleeding zu bhalde, so viel von de Biere aagschpritzt waer. Wann die Eppel zeidich kumme waere, hedde mir gewisst ass es Seider ball geebt.
Ass die Yaahreszeide kumme und gange sinn, gebt’s uns immer uff ebbes zu schpitze, unn es iss noch besser ass mir henn es darrich em Yaahr sei Rescht verfehlt.
Mir henn Dinge net meh zu verfehle misse. Schiergaar alles iss zeidich in der Supermarrick. ‚S iss besser denneweg, awwer der Breis iss ass nix nie so gut schmacke watt.

Kevin Sterner (Gilbertsville, PA)