‘S Katz Deitsch Schtick | Hiwwe wie Driwwe



´S Yaahr iss alt. Sei Haar sinn dinn.
Guckt gaar nimmie gesund.
Weess, ass sei Daage rum ball sinn,
Kennt aa sei letschti Schtund.

En latt iss gschehne, deel aa net.
All sell ruht unnich Schnee.
Weiss iss die Welt – der Weg, wie’s sett.
Doch duhn Gedanke weh.

Noch waxt der Muhnd, noch watt er glee.
Nix bleibt. Un nix geht fatt.
´S iss alles waahr, was mer kann seh,
Un doch aa letz en latt.

Ball kummt der Belzenickel bei,
Deel Kinner waarde bang.
En Grischtbaam holt en Paep ball nei
Ins Haus. Die Zeit watt lang.

Waarscht aa en Kind. Denk mol zerick.
Du meindscht noch, wie sell fiehlt.
Heit glaabscht nimmie an der alt Nick,
Hoscht ihn schun oft geschpielt.

Ball schlagt em Yaahr sei letschti Schtund.
Noht iss es rum – wie’s sett.
Een Daag machscht aa mol zu dei Mund.
Doch wann sell iss, weescht net …

Michael Werner
(im Yaahr 2017 naach Erich Kästner)

**Strohhutfescht Frankedahl (Quelle: Wikipedia)**

Beim Erich Mace

Ich kumm vun Bern Taunschip, Barricks Kaundi, Pennsilfaani bei, awwer sidder siwwe Yaahre wuhne ich mit meinre Fraa und drei Kinner in Fraankedaal, Deitschland. En Daag waere mir waahrscheinlich heemziege, un deswege versuche ich alsemol ebbes vun unsrem Lewe dorum in Fraankedaal nunnerzuschreiwe, fer mich und aa fer meini Familye un ihre Noochkumme. Desmol schwetze ich bissel iwwer es Schtrohhutfescht do in Fraankedaal.

Nau mei Groossdaadi hat als en Schtrohhut uff dem Kopp ghatt, wie er in Pennsilfaani im Gaarde geschafft hot, un viel Leit dattdriwwe in Barricks Kaundi duhne Ihre Strohhiet alsnoch draage wege dem un sellem. Es gebt viel Bauersleit in Barricks Kaundi un es Schtrohhut is noch en gutes Ding fer hawwe uff der Bauerei, wann es sonnig iss. Dohiwwe wo mir graad wuhne gebts aa viel Bauereie. Die Gegend, wu die Vorderpalz heesst, waert aa liewevoll der Gemiesgaarde vun Deitschland genennt! Wann mir mit em Bicycle yuscht en wennich naus faahre daet, daet mer viel Wege finne, die iwwer em Bauer sei Feld fiehre. Datt kann mer gut sehne, ass es gans viel Obst und Gemiese wachst, zum Beischpiel Welschkann, Weeze, Grumbiere, Gaerschde,Gellriewe, Broccoli, Blummegraut, Koppgraut, Eppel un viel meh. Nau viel Schteddel yuscht glee bissel weschtlich vun Fraankedaal negscht en Paelzerbarrige bauere Wei an de Hiwwle. Sie feiere ihre Weiaernt un alles dreht sich um der Wei. Awwer Fraankedaal hot yuscht es Obst und Gemiese un daerf en Weifeschd net feiere.

Im Yaahre 1973 hen die Groosskepp in Fraankedaal iwwergedenkt, die alt Schteddelmidde yuscht fer rumlaafe mache. Frieher hen die Kaers darrich die Midde faahre daerfe, awwer wie viel Schtedt in Deitschland sellemols, hot Fraankedaal die Midde fer yuscht rumlaafe und eikaafe bedenkt. Fer sell ausbrowiere, hot es Schteddel vum 31t Moi bis 2t Yuni die Kaers verbodde un en Feschd geschmisse. Fer drei Daage hots Schtend gewwe fer Esssache un Gedrenk, Myusik un en Schliffelmiehl fer die Kinner. Des Wochenend waar es aa Himmelfaahrt gewest, un die Leit hedde einnihau feiere welle. Die Himmelfaahrt gedenkt, ass Yesus nuff in der Himmel geflogge iss un am gleiche Daag gebts Vadderdaag dezu. Well, seller Blaan hot gut geschafft un sidder em Yaahr 1975 iss es Fescht alsfatt am Schpringe. Am Vadderdaag duhne die Daadis Schtrohiet draage, deweil es Wedder gewehnlich summerich iss. Sell, zamme mit de Bauersleit un ihre Schtrohhiet, hot dezu gefiehrt, ass es zum „Schtrohhutfescht“ waere iss.

Des Yaahr hots es 50t Yaehrlichfescht gewwe. Nau nemme ich dich mit un mir gucke, was es alles zu duh gebt. Mir laafe mol ins Schteddel vun der Weschtseit nei, wu der Riggelweg iss. In der Bahnhofschtrooss finnt mer die erschte Staetsch, wu es Myusik gebt. Weiter finnt mer viel Schtrohhiet, wu verkaaft waere. Du sehnscht viel Leit mit Schtrohiete rumlaafe und alliepper hen bunte Gnepp drauf gebappt. Die sin die Strohhutfeschd „Buttons“. Alleyaahr gebts en neier Gnopp zu kaufe, wu mer schtols uff en Schtrohhut schtecke kann. Des Yaahr hot mer 20 tausend Gnepplin verkaaft! Deel Klubs sehnt mer aa. Die verkaafe ihre eigeni Imse und Gedrenk. Mariyets un Nochmiddags gebts viel Leit, awwer oweds drenge sich die Leit ins Schteddel. Die Bahnhofstrooss fiehrt in die Midde uff der Marrickblatz, un datt hot mer die greesscht Staetsch. Uff dem Marrikblatz waert es Feschd eigeweiht un geschtaert. Alleowed gebts die greeschte Bands aus der Gegend, fer die Nacht schee ausglange.

In der Midde vum Marrickblatz gebts es ganz Yaahr rum en groossi Schtang fer Dinge uffhenke. Zum Beischpiel, im Hanning waert er geputzt fer Faasenacht feiere, un im Moi gebts datt en geschmickter Moibaam. Fer der Schtrohhutfeschdt macht mer ebbes abaddiches und schtellt en ganz grosser Schtrohhut uff die Schtang. Der do Hut iss ungefaehr so grooss wie en kleini Kaer, verleicht so grooss wie en Volkswagen Kefferli. In der Wormser und Speyerer Schtrooss gebts noch zwei Hiet dezu, wu uffgehenkt sin un iwwer der Schtrooss schwewe.

Vun Marrickblatz laaft mer naadwaerts in die Wormser Schtrooss. Des Yaahr hots datt en Dreen gewwe, wu Leit darrich es Schteddel faahrt. Sell war ebbes fer mei Kinner des Yaahr. Nau hebt mer der Kopp uff un sehnt im Nadde am Wormser Dor en Riesenraad (en Ferris Wheel). Des do Raad is gans grooss un gratz schier gaar die Gebeier newedraa. Eb mer mit em riesiche Ding nufffaahrt, kann mer Frankedaal un die ganze Gegend schee begucke.

Zerick zum Marickblatz un mer misse nooch Sudde in die Speyerer Schtrooss noch laafe. Datt hot mer aa en scheeni Reih vun Schtend un Klubs un en groosser Schtrohhut henkt do in der Luft. Zum Schluss am Speyerer Dor gebts noch en Myusikstaetsch, die „Eechebaam“ Staetsch. Mer finnt nooch en viert groossi Staetsch in der August-Bebel Schtrooss. Selli is yuscht bissel schraegs vum Marrickblatz verleicht 150 Yaard weg.

Fer die Kinner gebts en ganzer Blatz hinnich em Rotshaus mit re Kinnerstaetsch un Schpiele, wu es alledaag ebbes zu duh gebt. Datt sehnt mer verschiedeni Gruppe vun de glee Baeryer wu Myusik schpiele, singe, danse un selbscht Karate und Tae Kwon Do vormache. Abaddich fer die Kinner iss aa der Schteddelbrunne uff dem Marrickblatz. Die Kinner daerfe datt neilaafe un im Wasser blatsche. Paar mol gebts dezu en Bobbeshow. Net weit weg faahre die Bumper-Kaers un geschtraet darrich es Schteddel gebts anneri Schliffelmiehle un Schtofft fer die Kinner zu faahre.

Es Feschd nemmt vun Dunnerschdaag bis Sunndaag blatz, un alledaag gebts abaddichi Zammeleef. Am Dunnerschdaag gebts der Aafang vum Fescht. Der Baeryemeeschder schwetzt bissel, das Radio ist do fer uff der Luft sei un die nei Miss Schtrohhut waerd genennt. Do an der Schtell muss ich yuscht en wennich auslegge, ass viel Schteddel en Weiprincess hen und die Miss Schrohhut iss wie die Weiprincess awwer yuscht fer die Bauersleit in Frankedaal. No gebts Myusik un alliebber fange aa zu feiere. Des Yaahr wege em 50t Yaehrlichfescht hot abaddich der Gowener vun dem State Rheinland-Pfalz geschwetz. Am erschte Owed hot en grossi Myusikgruppe aus der Palz gschpielt, „Die Anonyme Giddarischde.“

Am Freidaag un Samschdaag gebts daags anneri Myusikgruppe, zum Beischpiel, die wu Volksmyusik schpiele mit Blosinschtrumende. Dezu kann mer am Daag Schwetzer un Prograems fer mitmache uff die Schtaetsche finne. Oweds kumme nochemol die greesere Baende fer bissel lauter feiere.

Am Sunndaagmariyet gebts alsfatt en Raes, wu mer viere mol um es Schteddel rumschpringe daerf fer allzamme 5.5 kilometer. Selli du ich alleyaahr. Die Kinner daerfe aa mitschpringe. Die Schulkinner schpringe zwee mol um es Schteddel un die Gleekinner yuscht 200 Meter. No gebts am ganse Sundaag paar meh Dinger fer die Kinner un bis der Owed geht es Feschd zu End. Ab 2025 gebts en neies Schild mit em Countdown, so ass schun am naegschte Muundaag, alliepper kenne rückwärts vun 365 zaehle un sich uff es negscht Schtrohhutfescht freee.