Monatsarchiv: September 2025

Beim Amos Hoover, 9t Augscht, 2025, an die Muddy Grick Farm Library (Effridaa)

Amos: “Was ich hab zu saage hat mennscht zu du mit die mennischte Geschichte. Ich apologize zu die Leit es nett intressiert sinn. Menscht von die Mennischte denke, es mir sorte zwee Aafange vun die Mennischte henn. Mir henn die Nidderdeitsche, ass herkumme vun Menno Simons un sodergleich.  Mir henn aa die Hochdeitsche, ass von die Schweitze komme. Die Ausbund saagt vanne drin: “G’schriwwe bei die schweitzer Brieder”.

En Zuheerer:  “Amos, wann Du schwetscht vun die Hochdeitsche, bischt Du am schwetze vun die blehne (Plain) Leit un die net blehne?”

Amos: “Yahre zurick, der “Hochdeitsch” hat g’meent “Elevation”. Ich denk’s meent nimme ganz sell.  Die Leit vun die Schweitz, sell’s wu die Mennischte g’schtaehrt henn, die eent Sort, un die sinn unsere Sort Mennischte.  Die Blattdeitscheleit henn en viel greesere Success so weit es die Nummers gehn. Sie sinn ganz iwwer g’schtreut. Ganz iwwer Nord un Sudamerika un noch weiter. Die Schweiter Brieder henn sorte separate aag’fange. Der Menno grickt mennscht vun der Kredit fer Sie z’samme griehe in die Nidderlaender, un awwer, er hat net so gut geduh mit die Schweitzer. Er hat actually sie all in der Bann geduh. Wann Du guckscht im Menno Simons Buch, “Reply to Sylis and Lemke”.  Sell iss en Anwort zu die Schweitzer Brieder. Er hat gar nett z’weeg komme kenne mit Sie. Awwer, immer zitter sell henn die Schweitzer Brieder un die Nidderland Mennischte browiert sich vereeniche. Schon in 1590 war es, was sie “Concept of Cologne” g’heese henn. Wann weiter gehe witt, kannscht du’s aa uffgucke im Mennonite Encyclopedia. In 1591 henn Sie schon en grosse Meeting g’hatte fer browwiere eenich warre. In die Schweitz hat es so en schlimme Verfolging gewwe. Die Schweitzer Brieder sinn aus die Reformierte Karich komme, un die Reformierte henn die schweitzer Brieder datt raus yaage welle.  Es war seefer fer sie in deel vun die annere Laender.  So wie in der Palz un aa in Elsass (Alsace saagt mer im Englische).  Es waare aardlich schweizer Leit in Alsace nei gezooge.Noh, henn die nordliche Mennischte (in die Nidderlenner) browwiert die Schweitzer mit helfe.  Eeh Ding, ass die Schweitzer geduh henn, iss schtoppe sich der Name Wiederteifer heesse (weil es en ganz schlechter Name g’rechelt war), es war schun gehe die katolische Ordning en dausend Jahr. Ich meint der Gary Waltner (ass do hiwwe war) saage, ass die Landeegener (in der Palz un in Alsace usw) henn g’sagt, ass Sie henn die Schweitzer gegliche. Die Schweitzer waare “die Flichtlinger”, ass raus aus die Schweitz kumme sinn, un sie henn in Suddeitschland gsettelt. Un ess waar ihne gsaat “heeset eich selwert Mennischte. Sell iss viel besser ass eich Wiederteifer heese, es iss gehe der Regel.”  Un noch emol eens, an sellre Zeit henn die hollandische Mennischte en guter Name g’hatte.  Der mennischte Name waar viel seefer als wie Wiederteifer. So iss es vorgfalle, ass die Schweitzer “Widderdaafer” henn browwiert der Mennischte Naame aanemme.

Eeh gros Ding hot bassiert in Ohnenheim viel Centuries zerick.  Ohnenheim iss mittes in Elsaess.  Elsaess iss en gleenes Schlifferland zwischich Frankreich unn Deitschland. 

Kompletten Beitrag von Amos Hoover als PDF lesen: Bitte hier klicken.