Monatsarchiv: Februar 2010

Der Oschderoierbaam

Lange Yaahre zerick henn unsere Voreldere viele Gewohnheide vum alde Land mit naach Amerika gebrocht. Eens devun waar der Oschderoierbaam. Weil alles frieh im Friehyaahr so drieb un leer iss, henn sie gfarebde Oier uff en Baam ghenkt fer alles schenner gucke mache. Do in Pennsylvaani duhne viele Leit widder die alt Gewohnheit zum Lewe bringe.
Mer nemmt rohe Oier un dutt sie ausblose. Fer sie ausblose, muss mer an de zwee Enner mit ‚me Schtechnoodel schtecke, un dann drin rumriehre bis der Dodder un es Weiss vum Oi gut uffgschtarrt sinn, dann am eende End neiblose, so ass es Schtofft am annere End raus kummt. Denno henn sie die leere Schale gfarebt.
Wie henn sie die Farewe gemacht? Fer en goldenes Gehl mache, hot mer en halwes Kuppche Rinn vum Hickernissbaam genumme, fei uffgebrocht, zwee Kuppche Wasser, en Teeleffel Essich un en Patz Allau. Die Brieh hot mer fer en halwi Schtunn langsam gekocht, un denno die Oierschale dezu nei (odder die hattgekochde Oier in der Brieh gemacht).
Deel vun die Oier waare aa „Binsegraasoier.“ Sie henn sich Binsegraas aus der Wiss uffgsammelt, henn’s weech Marick mit ‚me dinne Droht rausgschowe un henn dann mit ‚em Marick die Oier schee gschmickt. Wann die Oier faddich waare, henn sie sie uff en Baam ghenkt fer alli-epper Blessier zu gewwe.

Barbara Miller (1932-1998)

Hexezeeche sinn in Pennsylvaani schun lang bekannt. Im 19. Yahrhunnert henn die Leit gschtaert, sie uff ihr Scheier mole. Scheierschtanne sinn heit en Symbol vun die Pennsylvanisch-Deitsche – abbadich in Baricks Kaundi.

Hurrah fer der Winter

Hurrah fer der Winter, hurrah fer der Schnee!
Nau raus mit’m Schlidde, un zaehl mer kenn zwee.
Do muss mer sich dummle, sunscht geht er eweck;
Verleicht bis uff maryie hot’s nix ass wie Dreck.

Hurrah fer der Winter! Der Schlidde muss raus.
Was hockt mer am Offe, was will mer im Haus?
Un druff mit de Belle, sunscht iss ’s kenn G’fahr.
Der Winter iss katz un die Schliddebah rar.

Hurrah fer der Winter! Nau geht’s emol ab.
Wie schneller, wie liewer. „Git up, Sal un Bob!“
Was rabble die Belle, was schpringe die Geil!
Des iss mol en G’fahr, es geht ya wie’n Peil!

Hurrah fer der Winter! So ebbes iss G’schpass.
Die Meed singe ‚en Liedel, die Buwe der Bass.
Un geht’s in die Schneebaenk un schmeisst’s emol um,
Geht’s drunner un driwwer, was gebt mer dann drum?

Hurrah fer der Winter! Mit Eis, Schnee un Kaelt!
Wann’s glaenzt ass wie Silwer – sell iss yuscht, was fehlt.
Wann’s Schnee hot, watt g’fahre, wann’s Eis hot, watt g’schkeet,
Hurrah fer der Winter, abbadich, wann’s schneet!

Hurrah fer der Winter, hurrah un hurrah!
Nau raus mit’m Cutter un druff mit der Fraa.
Un loss ’s mol klingle, dass alle Hund blafft!
Der Winter iss do un die Arewet iss g’schafft.

Astor C. Wuchter (1856-1922)

Gebt acht: Am zwett Hanning schtaert ’s Project „En Friehyaahr fer die Mudderschprooch 2010“. Meh Information kammer gricke uff em Heemetblatt „www.mudderschproochfescht.wordpress.com“.