Category Archives: Pfalz und Pfälzisch

Am Sunndaag, der fuffzeht Oktower 2017, nemmt der zwelft Deitsch-Pennsylvanisch Daag Blatz im Schtettel Billigheim-Ingenheim (Palatinate, Germany). Die Special Guests des Yaahr sinn der Mike un die Linda Hertzog vun Blandon (PA). Sie schpiele pennsylvanisch-deitsche Musick un deel Country Schticker – mit Banjo, Guitar un Bass Violine. Newich sell gebt’s zwee yunge Kalls, ass alleweil en Documentary am zammegricke sinn iwwer die pennsylvanisch-deitsch Schprooch un Kultur: der Christian Schega un der Benjamin Wagener. Un ya, es watt aa en latt gedanzt, weil der “12. German-Pennsylvanian Day” nemmt Blatz in die Heemet vun die “Trachtengruppe Billigheim”, un sell Drupp Leit iss die alde Daense noch am duh. Mer gucke vaschich zu sell. Die Versammling schtaert am zwee Uhr am Naachmiddag.

Do gebt’s wennich meh Information:
12. Deutsch-Pennsylvanischer Tag 2017 (Billigheim – Pfalz) – Programm

Es “Mennonite Research Center” (Mennonitisches Forschungszentrum) in Weierhof in die Pfalz hot sitter 2016 nei Archive, ass die Kultur un die Schprooch vun die Pennsylvanisch-Deitsche abweist zu alle Bsucher. Meh wie 1,200 Bicher, 100 CD’s un 120 Folders mit mehr wie 16,000 pennsylvanisch-deitsche Gschichte un Gedichte hot der Dr. Michael Werner (links uff em Pickter), Publisher vun “Hiwwe wie Driwwe”, vun sei Heemet zu sell neier Blatz gebrocht. Der Gary Waltner (in die Mitt) un die Astrid von Schlachta, Director vum Research Center sitter 2015, sinn froh fer sell Gschenk. Es “Mennonite Research Center”  iss en guud bekannter Blatz. Alle Yaahr kumme en latt Leit – abbadich Mennischte un Amish – aus Pennsylvaani, Ohio, Indiana, Illinois un annere Gegende ins alte Land fer sehne, wu die Voreldre gelebt henn, eb sie abgschtaert sinn ins neie Land. Awwer aa en latt Leit im alte Land henn en groosser Interest in die Gschicht vun die “Palatines”, ass naach America gezogge sinn. Nau gebt’s im Archive net yuscht Bicher iwwer die Gschicht vun die Mennischte un Amish, awwer aa iwwer alle Pennsylvanisch-Deitsche (aa Luddrische un Refemierte), ihr Schprooch un ihr Kulduur. Der Name vun die nei Collection iss “Deutsch-Pennsylvanisches Archiv”.

Paelzer (Palatines)

Werd eens gebore, wu egal,
in Schpeyer odder Frankedaal,
in Neistadt, Lautre, Bermesens,
im Paelzer Wald, or nah die Grenz,
am Dunnerschberg, or aach am Rhei,
des kann dann blooss en Paelzer sei.

Doh waar die Mudder graad mot fort,
an irgend emme fremme Ort,
kummt in die Woche — irgendwu,
aach des gebt dann en Paelzer Bu,
or Paelzer Maedcher, des iss klaar –
un wann‘s in Buxtehude waar.

Dann gebt‘s aach noch e drittie Sort,
die wohnen weit, am fremme Ort,
wie Pennsylvaani, beischpielsweis,
un fallen uff durch Schprooch un Fleiss
un waaren niemols in de Palz.
Aach des sinn Paelzer, jedenfalls!

E viertie Sort sinn die am Enn,
die wu kee Paelzer Eldre henn.
Wu zugewannert irgendwann
un machen nie de Palz en Schann.
Aach des sinn Paelzer, ganz gewiss,
selbscht wann die Haut mol farwich iss,
so guud wie alle annre aa:
Ich hoff, des iss jetzt yedem klar!

Paul Tremmel
Forst (Palatinate, Germany)

Dihr liewi Leit,

Glaabt’s odder net, awwer mer henn yuscht paar Daag zerick en glee neie Zeiding gschtaert, ass mer yuscht online lese kann im weltweit Gewebb. Der Name vun selli Zeiding iss “DEITSCH”, un sell weist, ass ebbes gschriwwe watt datt iwwer die Leit, die Schprooch un die Kulduur vun die Pennsylvanisch-Deitsche in Pennsylvania un anneri Schteets. Awwer: Die Zeiding iss Hochdeitsch gschriwwe. Mer wisse, ass net zu viel Deitsche in Pennsylvania un aryiets schunscht “Deutsch” lese kenne, awwer mer henn sell gschtaert abbadich fer Leit in Deitschland, Alsace/Lorraine (France) und die Schweiz im alte Land. Mer welle sie ebbes lanne vun was am aageh iss driwwe im neie Land. In des do Issue kammer ebbes Lese vun die Zeit eb Grischtdaag in Pennsylvaani (wann der Belznickel kummt), vun Deitsche, ass gfochte henn in Gettysbarick in 1863, un aa en Grischtdaag-Gedicht, ass der John Birmelin gschriwwe hot in die Mudderschprooch Yaahre zerick.

Abbadich gleiche mer unser Cover-Pickter. Sell waar geduh bei die Rachel Yoder vun Boyerschtettel. Sie hot ihr Art Business gschtaert en Weil zerick un duht alleweil en latt Fraktur Schtofft, Hexezeeche un aa seller wunnderbaar Belznickel, ass ihr datt uff em Cover sehne kennt. Guckt seller Kall bekannt zu eich? Ferschur, ich denk, ich hab ihn schunt etliche Mol in Kutzeschtettel gsehne. Un er hot aa ebbes zu duh mit “Hiwwe wie Driwwe”.

Die Rachel Yoder hot en neier Web Shop, wu sie deel vun ihr Schtofft nei geduh hot. Wann ebber geindresst iss in ausfinne, was sie am duh un was sie am verkaafe iss: Rachel Yoder Art

Viel Gschpass beim Lese!
Der Hiwwe wie Driwwe Drucker