Category Archives: Pfalz und Pfälzisch

Glaabts odder net, awwer heit hawwich fers erscht Mol Latwarick (Latwersch) gsehne in en Shop in unser Schtettel. Gmeenerhand kammer ebbes wie sell net datt finne. ‘S iss zu “local”.

In die Pfalz im alte Land un in Pennsylvaani saage die Alte zu die Kinner: “Der Schtorich bringt die Kinner.” Odder aa: “Die Schtorich duhn die Windelbopplin rumdraage.” Ya, well … in en Schul in die Pfalz (Palatinate) henn die Kinner en wennich in ihr Mudderschprooch schwetze darefe. Gmeenerhand gleiche die Schulmeeschter im alte Land sell net. ‘S iss in wennich wie in en eeschtubbich Amish-Schul in Pennsylvaani. Datt sette die Kinner yuscht Englisch schwetze, net Pennsylvanisch-Deitsch. Der HwD Drucker hot paar Amish-Schule bsucht in Pennsylvaani, Maryland un Ohio un in die Mudderschprooch gschwetzt zu die Schieler, ass zamme ghockt henn in yuscht een Schtubb vun Grade 1 zu 8. Un dihr kennt sell glaawe: Mer henn nanner guud verschtanne mitaus English. Eenicherweg: In des do Video lese die Kinner im alte es Gedicht “De Klapperschtorich” in Paelzisch – ihr Mudderschprooch.

Herr iwwer die Zeit

Wach uff, schteh uff, un loss dir grateliere,
du hoscht allmaehlich yo Routine drin,
un loss dich widder vor dei Kerzle fiehre
un denk: “Reschpekt devor, wie alt ich bin!”

Du hoscht emol gemaent, erwachse werre
un grooss sei, misst es Allerschaenschte sei,
un dein Geburtsdaach – schwupps – der losst dich schnerre
mit aenem Ruck ins neie Alter nei.

du hoscht gedenkt: “Es kummen yo mol Daache,
do gheer ich selwer zu de groosse Leit,
do henn die mir net immwer was zu saache,
do bin ich selwer Herr vun meinre Zeit.”

Heit freehscht dich, wann mol eens noch iss am Lewe
vun denne, wu du noch gedenkscht als Kind.
Nix bleibt, nix bleibt, du kannscht die Zeit net hewe,
sie rinnt wie Sand dohie, sie rinnt un rinnt,

rinnt als Erinnrung in dei Lewensschissel
un du weescht net, wie weit ‘s noch iss zum Rand.
Die Schissel, Gott, die wackelt als e bisser –
Wass driwwer laaft: Fang’s uff in Deinre Hand!

Karin Ruppert
Speyer, Palatinate (Germany)