Category Archives: Pfalz und Pfälzisch

Der 6. Deutsch-Pennsylvanische Tag nemmt Blatz am Sunndaag, der 16. Oktower 2011, im glee Schtettel Weierhof (Palatinate) im alte Land. Der Haabtschwetzer des Yaahr iss der Don Breininger vun Nei Tripoli. Die Versammling schtaert um 2:30 p.m. im Gmeehaus vun die Mennischte.

Do iss es Program: PG DPAK Programm Deutsch-Pennsylvanischer Tag 2011 _final

Glaabt’s odder net, awwer sell hawwich heit gsehne im Busch. Ich hab en Nooschen, was sell sei kennt …

Do schicke mer en Gruuss zu alliebber im neie Land, wu alleweil aardlich am schwitze iss. Ya, ‘s iss schwiedisch heess im pennsylvanisch-deitsch Land. Der Paelzer Christian Habekost singt en Schtick Musick in die Mudderschprooch, un sell heesst: “Die Hitz”.

Deel Leit henn mir en E-Poscht gschriwwe un gsaat, ass es kenn Gedier wie en Elbedritsch gebt – net im alte Land un net im neie Land, un ass sell yuscht en Gschpass iss vun Leit, ass ebber retze welle. Glaabt’s odder net, awwer in die Pfalz im alte Land henn sie Yaahre zerick en Elbedritsch gfange – yuscht eens! Un sell iss heit in en Museum im Schtettel Bad Dürkheim. Mer kann’s datt begucke un aa, wie’s die Leit gfange henn: mit Sack un Ladann (unne uff em Pickter). Mer publishe en grooss Pickter, so ass mer waricklich alles sehne kann …

Meh Pickter vun Elbedritsche kammer bei Hiwwe wie Driwwe uff Facebook finne. Klickt yuscht mol datt: Elbedritsch-Gallery.

Heit hawwich bei en Versammling schwetze selle iwwer Elbedritsche in Pennsylvaani. Ich hab schun uff em Dritschbarig ghockt in Lengeschter Kaundi fer etliche Schtunne mit Sack un Ladann, hab awwer nie net eens gfange. So hawwichs duh misse wie die Parre. Sie schwetze aa alle Sunndaag iwwer ebbes, ass sie nie net gsehne henn.