Archiv der Kategorie: Deitsch Web Radio

Weess noch net, eb ich sell gleich – awwer es iss ebbes Neies. ‚S iss es erscht Mol, ass ich ebbes wie Pop Music in die Mudderschprooch gheert hab. Ich deet gleiche wisse, wer sell Kall iss, ass sell Upload geduh hot. Wann er sell lest, sett er mir mol en E-Poscht schicke …

Paar Yaahr zerick henn der Lee Haas, der Paul Bittner, der Franklin Wanamaker, der Leroy Heffendrager und noch annere Kalls en „Pennsylanisch-Deitsch Webradio“ uff die Luft gebrocht in Lechaa Kaundi. Sell waar in 2003 un 2004. Noht henn sie es schtoppe misse, weil sie aus em Geld gloffe sinn. „Hiwwe wie Driwwe“ hot ihr Program noch paar Munete laenger ass „Webradio“ gepublisht, so ass die Leit es abhariche henn kenne. Dann waar’s verbei. ‚S duht uns leed, ass der Paul un der Franklin heit nimmie am Lewe sinn. So sinn mir froh, ass mir eens vun ihre beschte Programs – die „Kamikaze Pilots“ – widder uff unser Heemetblatt duh kenne. Mir winsche alliebber en latt Gschpass un en wunnerbaar guudes Yaahr 2010.