Vadder ich muß geh

Von Manfred Dechert

Vadder, ich muß geh
Des war ewe e Ohrfeich se vel
Muß fort aus dem Kaff wose sich
bloß die Mäuler verreiße iwwer die
wo e anneres Lewe han wolle
Baun Eier Häuser allee unn
werrn glicklich uff Eire Poschte
in de Ämter werrn seelich
in Eierm Vorgarte unn Eierm Verein
Drum muß ich geh

Ich fahr jetzt fort aus dem
schääne langweiliche Ort do
Mei Määre is aa gang drum fahr
ich weit weit fort Vive la France
Wer weeß was werd
Wer weeß was kummt
Do wo ich jetzt bin brauchsche kää Abitur
sondern: es: Iwwerlewe kenne!

Bu kum hääm – hans net so gemäänt
Bei de Fremdelegion sinn schun
Manche nimmie hämkumm!
Musch doch Niemand zeiche-
das de e Held bisch
Vadder, es is zu spät
Sollese mich in Afrika abschieße
oder sunschtwo uff de Welt

Vadder, ich muß geh
Will net lewe als Halbdoter in Eierm Dorf
met Eicheheim unn me Bier zuvel in de Wertschaft
Hasch geh misse, Bu
Han manche Nacht net geschlof
Hasch recht – des war e Ohrfeich zuvel!
No Zwanzich Johr kummt e Bu in Uniform
unn de Vadder is aa e bißche stolz

Bu, loß Dich dricke
Des war Dei Weg

1. Preis Lyrik beim 18. Sickinger Mundartdichter-Wettstreit
September 2025