Vum Lutz Pfeuffer
Ogfange hot des alles im Spätjohr 2024, wu de „Blohbariyer“ Scott Reagan im Oktower bei soiner „Hiwwe wie Driwwe Tour 2024“ unner onnerem ach bei uns dahäm in Altrip uffgetrete is.
Do hot mich domols de Vorstand vun unserm Hoimat- un Gschichtsveroin g’frogt: „Her, sache mol, du machschd doch mit doine Pälzer Krischer ach so Mundartmussig odder? Do kummt äner aus Pennsylvania in Amerika riwwer, der spielt Giddar un singt Lieder uff Pennsylvaanisch- Deitsch dazu. Henner käh Luschd, mit dem zomme ä bissel zu schbiele?“
Un so isses donn a kumme, de Grundstäh fer ä dollie, mussigalischie Zusommeärwet un ä wunnerbarie Freindschaft zwischem Blohbariyer un de Pälzer Krischer war geleggt. Mir hawwen uns donn Texte un Uffnahme niwwer un riwwer g’schickt, jeder hot fer sich dahäm geprobt un donn hawwe mer schließlich om 20.10.2024 beim „Hiwwe wie Driwwe Fescht 2024″ (18. Deutsch-Pennsylvanischer Tag) bei uns in Altrip im Birgerhaus ä schänes, schnugglisches Konzert gewwe. Die Leit waren begeischdert, uns all hot’s än Rieseschbass gemacht un om End hot de Scott gemäänt: „You must come to Amerika next year!“ Do hawwe sich die Pälzer Krischer all mitnonner ogeguckt un g’saat: „Why not?“ Gesagt, getan, somit war‘s klar: Mir gehe noch Amerika!
Un widder hawwe mer Texte un Uffnahme zum Scott un der ach zu uns g’schickt, mir ware beim Michael Werner dahäm, der hot uns mit neie Lieder un Texte versorgt un hot fer uns die erschde Kontakte geknipft. De Scott hot in Pennsylvania ä klänie Tournee zommeg’stellt, mir hawwen ä bissel Pennsylvaanisch-Deitsch gelernt un uns in oinische Prowe die Lieder druffg’spielt, korz un gut: Des Projekt „Hiwwe wie Driwwe Tour 2025“, bei dem mir mittlerweile donn a noch zu de offizielle Botschafter ernonnt worre sin, hot so richdisch Fahrt uffgenumme. Besunners schäh war’s, dass unsern Birgermeschder, de Volker Mansky, sich uns mit äner Grupp vun 16 Persone o g’schlosse hot un mir somit donn om 24.06.2025 mit äner Delegation vun 21 Leit in Fronkfurt in de Flieger g’schdigge sin.
Nochdem die meischde Leit vun uns sich donn drei Dach long New York un paar onnere New Jersey ogeguckt g’hatt hawwen, ging’s donn ab in Richtung Kutztown, des Partnerschdäddel vun Altrip. Am 27.06.2025 war’s donn soweit, mir fünf Musigger hawwen in Nazareth uns mit’m Scott Reagan getroffe un durfte mit ihm, weil er jo dort a schafft, die Gidarrefabrick vun „Martin Guitars“ besichtische, was fer unser Bänd nadierlich ä gonz dolles Erlebnis war! Wonn hoschd donn schunn ämol die Meglischkeit den Bau vun so äner Giddar vum Ofang bis zum Schluss zu sehne un donn a noch än Fachmonn wie de Scott dabei zu hawwe, der wu der alle Froche bis ins klänschde Dedeil beontworte konn. S’hot net viel g’fehlt un unser Giddarischde hätte sich dort ä neies Inschtrument gekaaft!
Noch dere Besichtigung hot uns de Scott zu sich dahäm zum Middachesse oigelade, wo soi Fraa, die Ämelie, fer uns ä leckeres Feschber uff de Disch g’stellt hot. Do hawwe mer donn mol so rischdich zug’schlache, es war voll legger! Oschließend hawwe mer donn die gonze Mussiginschdrumente in die Audos gelade un sin do druff hie zu äm Mussig-Fachhondel g’fahre, wu mer zusätzlich noch ä Mischpult, Lautschprecher, Schtative, Mikrofone un alle Sorte Kawel abg’holt hawwe. Somit war unser Äkwippment komplett un ab ging’s in Rischtung Rääding zu unserm erschde Ufftritt im Berks History Center. Eigentlich wollte mer dort in aller Ruh‘ uffbaue un mit’m Scott gemiedlich unsere Lieder ämol durchspiele, des hot awwer leider so net geklappt. Uns hawwen nämlich noch zwee Microkawel und zwee Microhalter g’fehlt, die de Scott donn in Rääding erschd emol besorge gemisst hot. Wie des Zeich donn endlich do war, hawwe mir noch ä Probläm mit’m Mischpult kriggt un die ä Monitorbox hot a net des gemacht, was mir gewollt hawwen. Bis des alles endlich uff de Reih‘ war, waren schunn die erschde Gäschd im Saal un somit war’s zum Prowe vun uns’re Lieder ä bissel zu spät. „Macht nix“ hawwen mir uns g’saat un hawwen äfach direkt mit unserm Programm losgelegt. Un so hawwe mir quasi ä Generalprob fer die nägschde Ufftritte gemacht. De Leit hot’s g’falle un mir waren im Großeganze a zufriede.
Am negschde Dag ware mer donn beim German Day im Pennsylvania German Cultural Heritage Center in Kutztown. Do ging des schun morjens um zehne los un mir musste deshalb frieh uffstehe, weil mir jo unser gonzie Olag widder uffbaue gemisst hawwen. Dort hawwe mir donn a die gonz onner Bagasch getroffe, die än Dach vorher noch Kutztown kumme un vum Birgermeschder Jim Schlegel empfange worre sin. Die hamm sich on dem Dach Kutztown un die Umgewung ogeguckt un ware allmitnonner als Gäschd beim German Day oigelade. Des war wirklich ä schäänie Verostaltung, mir hawwen am Ofang unser Mussig gemacht un donn ging’s weiter mit verschiedene Vorträg un G’schichte, wu all in Pennsylvansich-Deitsch vorgetrache worre sin. Noch änere Paus ware mir donn widder droh un om Schluss vun unserm Ufftritt, des is uns bis dohie wirklich noch nie bassiert, ware die Leit g’schdonne un hänn Beifall geklatscht – es gebt fer Mussiger nix schääneres un ich det ämol sache, dass mir mit unserer Delegation unser Hoimatgemoinde Altrip gut repräsendiert hawwen. Weller Birgermeischder b’sucht schunn soi Partnerstadt un hot do a noch ä eigenie Band dabei?
Om Sunndach noch dem German Day hawwe mir donn glei zwee Ufftritt zu schpiele g’hatt, der erschde war middachs um zwölfe im „Dillingersville School House“ in Zionsville. Do hawwe mir in äm Zelt, des hinner äner kläne Kirch uffgebaut un wo morgens vorher än Gottedienschd war, g’schbielt. Des war wirklich a än dolle Ufftritt dort, wonn’s norre net so furchtbar warm gewese wär. Awwer äm Scott soi Eltern hawwen uns dort mit kalde Getränke und Wassermelone versorgt un hawwen immer uffgebassd, dass käner vun uns umfallt odder gar verdorschd.
Nochdem mir abgebaut un uns vun de Leit dort verabschied g’habt hawwen, ging’s weiter zu unserm ledschde Ufftritt ins Schwenkfelder Library & Heritage Center“ in Pennsburg, wu mir bereits um fünfe Nochmiddachs widder schbiele gemisst hawwe. Awwer dort war’s donk Klimaolag sehr ogenehm un mir hawwen nimmie so schwitze misse.
Eigentlich wär domit unser klänie Turnee ferdisch gewesst, wär do net die Ruth Baker gewese, die uns am German Day in Kutztown oigelade hott. Sie det uns gern ä bissel des Amishlond zeige un donn oschließend uff de Nochmiddach mit uns im Liederkronz Lancaster mit ihre G’songsfreunde dort ä bissel Pälzer Lieder singe. Des hott fer uns schää gebasst, wollte mir doch sowieso on unserm freie Dach uns ä bissel die Gegend dort ogucke. Dass mir donn im Liederkronz Lancaster sogar noch unser Pälzer Mussig hawwe mache dirfe un die dort a noch ä paar Giddarre g’habt hawwe, war fer uns der finale, krönende Abschluss!
So bleibt uns om End nur noch „Donke“ zu sache! Vielen Donk on de Scott Reagan, der des alles so wunnerbar organisiert hot! Donke fer soi Werksfiehrung bei Martin-Guitars, donke fer’s ausleihe vun de Inschtumente un dere gonze Olag un än groß Donk, dass mir mit ihm hawwe Mussig mache dierfe! Des war fer uns ä oinmalisches Erlebnis, mir werre des nie mehr vergesse.
Es war zwar schunn ä bissel ostrengend, mir sin jo schließlich a nimmie die Jingschde, awwer es war äfach nur schääh!!!
Hiwwe wie Driwwe 