Wu bischt du gebliwwe?

Wu bischt du gebliwwe mei Kind?
Ausem schtaerniche Himmel, bischt gefalle geschwind?
Wu hoscht dich verschteckelt? Wu waar yo dei Schutz?
Mir hen Yaahre gebet; hot yuscht nix genutzt.

Mei Daadi is weck, in der Erd schlooft er graad
Er schnauft nimmimeh, ken Odem in der Laad
Wie waar sell bei dir? Warscht wacker? Hoscht gedraamt?
Hoscht ihn mol gsehne? Waars dunkel un waarem?

Wu bischt du gebliwwe? Wu gebts dei Verschteck?
In em Floh seim Ohr? In em brockliche Weck?
Ich verschteh net fer was, helf mir sell zu begreife.
Wer hot dich geschtrickt, daed epper mir weise?

Wu kummscht du doch bei, aus der Schissel im Labor?
Hot der Dokder dich gebappt, ghemmert un gebohrt? 
Der hot zwaar gholfe, dich geriddelt, uns gerode
Un wie en schlippericher Frosch, waascht schtracks uff em Bodde!

Ei, es brillende Bobbel, gsund un vollschtendich!
Mit zeh wunslich Zehe, en Wunner, recht lewendich!
Willkum uff der Erd, bei uns gebts Blatz
Du daerfscht do logiere, mei Bu, mei Hatz

Erich Mace
Hiwwe wie Driwwe Award 2023