Dihr liewi Leit,
Mer verlosse es alt Yaahr 2015 mit en schlechti Neiigkeet: Der Peter Fritsch vun Alburtis iss gschtarewe Disember 16. Er waar 70 Yaahr alt gwesst.
Ich hab der Peeder fer 21 Yaahr gekennt un ihn immer bsucht, wann ich in Pennsylvaani waar. Mit henn als ferschur en guudi Zeit ghatt minanner. Es letscht Mol hemmer nanner gsehne im Hanning 2015. Der Peeder waar en pennsylvaanisch-deitscher Moler, Schreiwer, Schwetzer und Musigant. Mit guudi Freind hot als es „Nei Yaahrs Winsche“ geduh fer etliche Yaahre. Sie sinn gezogge vun Haus zu Haus un henn en Seege gewwe fer’s ganz Yaahr. Der Peeder hot mir verzehlt, ass sei Paep sell schun als geduh ghatt hot Yaahre zerick. In selli Zeit henn sie’s nei Yaahr aa noch aagschosse mit die Flinte. Sell hot awwer gegnallt. Un weil die Buwe an alli Bletz ebbes zu drinke grickt henn gehich die Kaelt, henn sie etliche Mol am friehe Maryie neegscht nimmie ihr eegni Heemet gfunne. Sell hot der Peeder als verzehlt. Der Peeder hot die pennsylvanisch-deitsche Birth Certificates gemacht fer mei drei Meedlin, un ich bin aarick froh un dankbar fer sell. Ich hab der Peeder etliche Mol en Eilaading gewwe fer kumme ins alte Land un ausfinne, wu sei Voreldre gwuhnt henn. Er hot awwer als yuscht gsaat: „Nee, Michel, nee. Ich schloof’s ’s liebscht in mei eegen Bett.“ Heit gewwe mer uff hiwwe-wie-driwwe.de der Nei Yaahrs Winsch, ass der Peeder geduh hot en paar Yaahr zerick. Hattyje, Peeder, guuder Freind, un mach’s guud!
Mer winsche alliebber im neie un im alte Land
en guud un friddlich Yaahr 2016
Michael Werner
Der Hiwwe wie Driwwe Mann
Hiwwe wie Driwwe 