Im Moi
Im Moi, do kumme
Die Blaedder un Blumme;
Was is es doch immer im Moi so schee!
‘S is alles so frehlich,
Mer fiehlt sich so seelich,
Es macht ehm en Freed fer naus zu geh.
Die Veggel duhn singe, die Felder sin grie,
Die Fensemeis huppse am Riggel dehie,
Es schtreichelt der Wind so darich die Beem,
Die Ieme, sie hole der Hunnich schun heem.
Die Fleddermeis kumme,
Die Moikeffer brumme,
Der Voggel baut’s Nescht un legt sei Oi.
‘S is alles blessierlich,
Un des is nadierlich
Im frehliche, seeliche, glickliche Moi.
John Birmelin (1873—1950)
Hiwwe wie Driwwe 