‘S KATZ DEITSCH SCHTICK

Matz

Der Munet Matz iss wiescht un schee,
Es iss ihm net zu draue;
Den kammer nie net recht verschteh,
Iss eens vun denne schlaue.

Mol kummt er rei wie en Leeb so wild,
Geht naus ass wie en Lamm;
Mol iss er aafangs schee un mild,
Am End noch druwwelsaam.

Nau iss der Winder ball verbei,
Die Sunn verschmelzt der Schnee,
Un zimmlich ball watt’s Friehyaar sei,
Un’s Wedder widder schee.

Nau geht der Bauer naus uff’s Feld,
Un fangt mol aa zu bluge;
Er weess, er braucht ball widder Geld –
Im Winder kann er ruhge.

Er schteht schun uff var Daageslicht,
Schunscht grickt er net viel ausgericht –
Er braucht aa Geld fer Taxe.
So geht’s mol uff de Bauerei,
So watt’s aa, denk ich, immer sei,
So lang, ass Hinkel gaxe.

John Birmelin (1873-1950)
Langschwamm, Baricks Kaundi