Der Daxdaag (odder Grundsaudaag)
Wisst ihr, was en Daxhund is? Ya, gewiss, der glee Hund, as mer manichmol en “Brotwaschthund” heesse. Er kummt urschpringlich vun Deitschland, wu er geyust waar fer der Dax yaage.
Un was hot der Dax mit eenicheppes zu duh? Well, der Dax is eppes wie en Grundsau: er hot katze, dicke Bee un lange Glooe, wu er mit dief in der Grund neigraawe kann. Un im Winder schloft er datt drunne im Grund graad wie die Grundsau. Wisst ihr liewe Leit, as es am zwedde Hanning Lichtmess is? Un was hot Lichtmess mit eenicheppes zu duh? Well, feralders hen unsre Voreldre in Deitschland guud achtgewwe, eb der Dax vun seim Loch rausschlubbe daet un eb er sei Schadde sehne daet. Un ihr kennt eich denke, graad wann der Dax rausgschluppt is. Ya, gewiss—am zwedde Hanning!
Wie unsre Voreldre vun Deitschland naach Amerika riwwerkumme sin, hen sie ken deitscher Dax gfunne. Awwer die Grundsau hen sie nadierlich do hiwwe gfunne. Graad wie der Dax hot die Grundsau im Grund iwwerwindert. Nadierlich hot sie widder mol rauskumme misse. Wie lang kann mer schlofe unne mol eppes zu esse? Un wisst ihr gude Leit, wann die Grundsau aus ihrem Loch kummt? Ya, saag mol, wie glicklich kann mer sei? Awwer mer muss immer es Schlechde mit’m Guude nemme. In Deitschland hen sie yuscht vier meh Woche Winder, wann der Dax sei Schadde sehnt. Do hiwwe hen mer noch sex Woche Winderwedder. Der Alt Professer glaabt, as mer eppes net richdich duhne.
Earl C. Haag
Guck der Grundsaudaag live:
Klick yuscht datt, mariye frieh 6 a.m. in Pennsylvaani!
Hiwwe wie Driwwe 