Hanning
Im Hanning, der zwett im Kalenner,
Do is aa des Wedder net schenner;
Die Wind is am Yohle,
Verbrennt mer die Kohle,
Muss hitze noch meh wie im Yenner.
Was schluppt mer so gern in die Decke,
Will net emol’s Neesel nausschtrecke;
No schloft mer aa glei,
Der Maryie kummt bei,
Sie kenne ehm schier nimmi wecke.
Die Katze, die duhne net friere,
Do heert mer sie nachts karessiere;
Sin drauss uff der Fens
Un schwenke die Schwaenz—
Was duhn sie net alles browiere!
Vum “income,” do kumme die Taxe,
Die mache des Backebuch gwaxe;
Doch do sin die Aarme,
Gott dutt sich erbarme,
Die wisse mol nix vun so Faxe.
Un “Valentines” duhn sie uns schicke,
Die duhne uns hatzlich beglicke;
Deel schicke so Gschmees,
Des macht uns yuscht bees,
Do muss mer die Aage zudricke.
Doch macht uns der Hanning net bang—
Es henke die Wascht an der Schtang;
Mer hen aa noch Schunke
Un eppes zu dunke —
Der Hanning, er dobt nimmi lang.
John Birmelin
Hiwwe wie Driwwe 