Deitsch Web-TV: Virgil Schrock will en deitsch Website schtaerte

Virgil Schrock iss en Deitscher vun Illinois. Er waar uffgebrocht in en Amish Gmee, awwer er hot sie verlosse un wuhnt in Paris (France) nau. Er deet gleiche, en Website schtaerte mit Videos vun pennsylvanisch-deitsche Schwetzer vun unnerschiddliche Gegende. Uff en Map will er abweise, vun wu die Schwetzer kumme, so ass alliebber sehne kann, wie die deitsch Mudderschprooch gschwetzt watt an unnerschiddliche Bletz. Wann dihr geindresst seid, duht eier pennsylvanisch-deitsch Video uff Youtube. Er kann sell noht leicht finne. Alles Bescht, Virgil!