Wann’s Winter watt
Der Deich, er hot en Haut gegrickt,
So ass mer neegscht druff laafe kann,
Die Fischlin warre schier verrickt,
Sie giekse mit ihr Naase owwe an.
Un nemmscht en gleener Kisselschtee,
Un warefscht ihn weit, dann heer, ‘s macht klirr
Un ditscher – ditscher – ditscher dirr,
hurray, du luschticher Kisselschtee!
Er zwitschert wie en Voggel schee,
Un duht ass wie en Schwalmli fliege,
Doch noht bleibt er, mein Kisselschtee,
ganz weit, ganz weit uff em Deich draus liege.
Do kumme die Fischlin, die Naaseweis,
Un gucke darich sell Fenschter aus Eis,
Un denke, sell Schtee waer ebbes zum Esse,
Awwer wie sie ihr Naase ans Eis aa presse,
‘S Eis iss zu dick, ‘s Eis iss zu alt,
Sie mache sich yuscht die Naase kalt.
Awwer bald, awwer bald
Warre mer selwert uff unser eegeni Sohle
Enaus geh kenne un sell Schtee widder hole.
Milton Ivvahzvarrich
Hiwwe wie Driwwe 