Wie Willi Weckel
Der Wie Willie Weckel,
Nixnutzicher Bu.
Er sucht un findt Druwwel,
No lacht er dezu.
Zieht Kieh ihri Schwenzel,
Yaagt Feddervieh weg.
Schlagt Weschschteiber nunner,
Schleeft alles im Dreck.
Er schpringt wie der Deiwel,
Un dschumpt in die Heh.
Verschreckt alti Weiwer,
Losst nix erecht schteh.
Dreet uff Hund ihr Schwenzel
Gschpaut uff die alt Katz.
Er yaagt mit sei Hollerflint
Die Amschel un Schpatz.
Was fehlt so en Rutzer?
En deiflischer Relbscht.
Gut schwaarde un bletsche,
Verleicht macht ihn en Helf.
“Nau genunk!”, saagt der Daadi,
“Des kummt zu en End.”
Nemmt halt an der Willie,
Zu der Holzschopp neigerennt.
Nau heere mer ihn yohle,
En madderlich Gegrisch.
Die Gatt uff seim Hinnerdeel,
Des drefft ihn recht frisch!
Nau nimmi unschuldich,
Beheeft sich ganz gut.
Der nei Willie Weckel:
En recht schmaerder yung Bu.
Peter V. Fritsch (Alburtis, PA)
Hiwwe wie Driwwe 