Zum Oschterhaas
Oh, Oschterhaas, Du guudes Dier!
Du bischt mir lieb un siess;
Dei Oyer taeste besser als
Des bescht gekochtes G’mies!
Dei Ohre, die sin grooss un lang,
Dei Schwanz is katz gebappt; –
Dieweil mir schloofe, kummscht du schtill
In unser Haus gedappt.
Du legscht dei Oyer in mei Hut,
Un gackscht ken eenzich Watt;
Duhscht alles in de schtille Nacht,
No gehscht du widder fatt.
M’r heert dich net, m’r seht dich net,
Doch bischt en guuder Haas;
Du kummscht un gehscht dei eegner Weg,
Graad wie der Santy Claus.
Du bischt ken brauner Choc’lat-Haas
Mit Ohre lang un g’schpitzt;
Mit schteife Bee un schteifer Hals,
Wu in de Fenschtre sitzt.
Oh nee! Du bischt ken Zucker-Haas,
Dei Oy ken Zucker-G’schleck;
Net g’macht in Fact’ries un in Schepp –
Net halwer Fareb un Dreck!
Dei Oyer, die sin glatt un brau,
Sie sin ken Choc’lat-Trash;
Sie fiedre, wann m’r hungrich is
So guud wie Brot un Hasch!
Ezra Grumbine (1845-1923)
Hiwwe wie Driwwe 